కవిత:మనస్విని వర్ణన

 మనసుని మాయ చేసిన 

ఓ చెలి నిన్నెలా వర్ణించను..

పదాల పూలని వర్షిపిస్తూ  

ఓ చెలి మది గుట్టునెల నీకెలా తెలిపను..

అదిగో అదిగదిగో 

ఆ..

..ఋతువుల గానం 

..ఆమని హరితం 

.కస్తూరి పరిమళం

అవన్నిటికి కారణం నీ నవ్వేనా

ఓ చెలి అంత అందం నీదేనా .. 

చూస్తే, చూడబోతే..

..రేరాణి వెలుగుజిలుగులు  

..నింగితారల మిలమిలలు 

..విద్యుల్లతల కాంతిపుంజాలు  

నీవు అరువిచ్చిన సొబగులనిపించే   

ఓ చెలి అవి నీ వదన మెరుపనిపించే..

కళ్ళతో నవ్వుతూ 

మాటలతో మంత్రం వేస్తావు..

తీయగా పలకరిస్తూ   

చిలిపి భావాలే రేపుతావు..

నీ మేని ప్రభ కిరణాల దాష్టీకాలను

ఓ చెలి వాటిని ఓపలేను, తాళలేను..

పెదవిని పంటనొక్కి 

గుండెకు గాయం చేస్తావు..

మందస్మిత చేవ్రాలుతో 

వలపుకి రాదారి వేస్తావు..

కలలలో నిన్నే వరించి హాయినొందా

ఓ చెలి అనురాగ ప్రణయహేలలో విహరించా..

రాజహంస నడకలు

కోయిల పలుకులు

ఊర్వశి సొగసులు

రతియ కులుకులు..

అపూర్వమైన ఆకర్షణలెన్నెన్నో నీలో తొణికే

ఓ చెలి నా హృదిని వలదన్నా కెలికి మురిసే..

అందుకే, 

మనసుని మాయ చేసిన 

ఓ చెలి నిన్నిలా వర్ణించాను..

నా హృది భాష్యాన్ని స్వీకరించి 

ఓ చెలి మనస్విని నీ చేయిని అందించుమా..

•••••••••

విసురజ/జగన్నాధ్

25/06/2024